4.2. Тұрақты даму саласындағы есеп: E аспектісі

«Маңыздылықты талдау» бөлімінде ашылған маңыздылықты талдау нәтижелері бойынша энергия тұтыну және энергия тиімділігі «Қазақтелеком» АҚ-ның маңызды тақырыптарының бірі ретінде танылды. Маңыздылықты айқындау кезінде Компания мүдделі тараптардың күтулерін, сауалнама нәтижелерін, ішкі сараптаманы, сондай-ақ тақырыптың операциялық шығындарға, сандық инфрақұрылымның тұрақтылығына, парниктік газдар шығарындыларына, климаттық күн тәртібіне және ұзақ мерзімді құн жасауға әсерін ескерді.

«Қазақтелеком» АҚ үшін бұл тақырып байланыс желілерін, деректерді өңдеу орталықтарын, базалық станцияларды, ЖИ-инфрақұрылымды дамытуды және есептеуіш қуаттарға қажеттіліктің өсуін ескере отырып, маңызды мәнге ие. Энергия тұтынуды тиімді басқару Компанияға операциялық шығыстарды бақылауға, экологиялық ізді азайтуға, инфрақұрылымның энергия тиімділігін арттыруға және сандық жүктеменің өсуі жағдайында бизнес-моделінің тұрақтылығын қолдауға мүмкіндік береді. Компания орта мерзімді перспективада жалпы қуаты 200 МВт-қа дейін ДӨО-ны дамыту жөніндегі ауқымды жобаларды қоса алғанда, сандық инфрақұрылымды жеделдете дамыту және есептеуіш қуаттарды арттыру бойынша мақсаттар қойды. Мұндай сценарийде энергия шығындары Компанияның қаржылық та, экологиялық та нәтижелерін айқындайтын негізгі факторлардың біріне айналады.

Энергия тұтынуды азайту мен энергия тиімділігін арттыру шығындарды оңтайландыруға көмектесіп қана қоймай, сонымен қатар компанияның экологиялық ізін азайтуға да ықпал етеді. «Қазақтелеком» АҚ климаттың өзгеруіне қарсы жаһандық күрестегі өз рөлін сезінетіні және энергия тұтынуды тиімді басқару осы күш-жігерге елеулі үлес болып табылатыны маңызды.

«Қазақтелеком» АҚ энергия шығындарын азайтуға және қоршаған ортаға әсерді барынша азайтуға бағытталған энергия тұтынуды басқарудың жүйелі тәсілін қолданады. Компания тиімді энергоменеджмент жүйесінің бар екенін растайтын ISO 50001:2018 халықаралық стандарты бойынша сертификатталған.

Компанияда энергоменеджмент саласындағы Саясат бекітіліп, іске асырылуда, оған сәйкес энергия тұтынуды мониторингтеу, энергия тиімділігін талдау және энергия үнемдеу шешімдерін енгізу жүзеге асырылады. Энергетикалық тізілімді жүргізуді, жабдықтың сапалық және сандық сипаттамаларын бақылауды, сондай-ақ тұтынудың базалық деңгейлерін айқындауды қамтамасыз ететін «Энергия түрлерін сәйкестендіру. Базистерді айқындау. Энергетикалық талдау» Құжатталған рәсімі енгізілген.

Өндіріс нысандарында жарықдиодты шамдарды, жарықтың автоматты датчиктерін орнатуды, энергия сыйымды оргтехниканы азайтуды, энергия үнемдеу режимдерін ескере отырып авариялық қуат көздерін пайдалануды қоса алғанда, энергия тұтынуды оңтайландыру бойынша іс-шаралар енгізілген.